لطيفة التونسية تطرح ألبوم “قلبي ارتاح”.. مزيج من الإحساس والجرأة

متابعة بتجــرد: طرحت النجمة لطيفة التونسية ألبومها الغنائي الجديد “قلبي ارتاح” عبر المنصات الرقمية، والذي يتضمّن أربع أغنيات جديدة تتنوّع بين الطابع العاطفي والرومانسي والواقعي الجريء، في خطوة فنية جديدة تثبّت بها لطيفة حضورها القوي في المشهد الغنائي العربي لعام 2025.

ويتضمّن الألبوم أربع أغنيات هي: “قلبي ارتاح”، “Sorry”، “هتقبلني”، و”معرفكش”، وقد تعاونت لطيفة من خلالها مع نخبة من الشعراء والملحنين والموزعين، مقدّمة توليفة موسيقية تمزج بين الإحساس العالي والجرأة في التعبير.

وجاءت انطلاقة الألبوم بالأغنية الرئيسية “قلبي ارتاح”، وهي من كلمات حسام سعيد، ألحان مصطفى الشعيبي، وتوزيع محمد ياسر، وتحمل طابعًا رومانسيًا دافئًا، عبّرت فيه لطيفة عن حالة حبّ ناضجة تنقذ القلب من وحدته وخوفه.

أما أغنية “Sorry”، فهي من كلمات مصطفى حدوته، ألحان أردني، وتوزيع كلوبكس، وتظهر لطيفة فيها بأسلوب غنائي ساخر وواقعي، يعكس توتّر العلاقة العاطفية بلغة شبابية وإيقاع عصري.

وتقدّم لطيفة في “هتقبلني” تجربة غنائية إنسانية عميقة من كلمات محمد شافعي، ألحان وتوزيع إسلام رفعت، وتتناول فيها فكرة القبول الكامل لشريك الحياة بكل الضعف والانكسارات.

بينما تختتم الألبوم بأغنية “معرفكش”، وهي من كلمات مصطفى حدوته، ألحان وليد العطار، وتوزيع كلوبكس، حيث تعبّر لطيفة عن خيبة الأمل من الحبيب، في طرح جريء يلامس مشاعر كثير من النساء.

يُعد الألبوم تأكيدًا جديدًا على تنوّع لطيفة الغنائي وقدرتها على المزج بين الرقي الفني والجرأة المعاصرة، ما يجعله من أبرز الإصدارات الغنائية هذا الصيف.

كلمات أغاني الألبوم:

1. قلبي ارتاح
كلمات: حسام سعيد – ألحان: مصطفى الشعيبي – توزيع: محمد ياسر

بعد سنين كنت بعيشها وقلبي وحيد
يومي ممل مافيش فيه جديد
وجوايا خوف من الأيام
شوفت عنيه أول قلبي ماشافهم داب
حبينا بعض حصل إعجاب
ويوم عن يوم عشقنا قوام

أيوه خلاص… جالي اللي هعيشله وهيعيشلي
أحلى الناس… كنزي الغالي اللي اتحوشلي
واللي لقيت نفسي معاه قلبي ارتاح
واطمنت على اللي باقيلي

والأفراح بعد خصام بدأت اهي تجيلي
والأيام حلوة معاه
قلبه جميل عيش قلبي في أحلى حياة
ببقى في مود تاني وأنا وياه
ونفسي أكون معاه على طول

صبح وليل مش بتغيب عن بالي عينيه
بمشي أكلم نفسي عليه
بحبه ياناس وتاني هقول…

2. Sorry
كلمات: مصطفى حدوته – ألحان: أردني – توزيع: كلوبكس

أنا حذرتك وأنت براحتك
أنا بعمل دا عشان مصلحتك
يا حبيبي أنا ميت مرة نصحتك
لو ناوي تبيع مش هشترى

لو كنت مكاني كنت سامحتك
وأنا جيتلك كذا مرة صالحتك
وأنا جاي أعتذر أني جرحتك
ف جرحتك… سوري

أنا ماكنتش قصدي سوري
كان غصب عني سوري
معلش اعذرني سوري
لا موأخذة يا حب أنا ما قصدشي

أنا ماخدتش بالي سوري
مش هيحصل تاني سوري
ما خلصنا يا غالي… سوري سوري
مش هفضل أقولك معلش

3. هتقبلني
كلمات: محمد شافعي – ألحان وتوزيع: إسلام رفعت

هتقبلني بكل ما فيا من أحزان
وكل ما فيا من خذلان
بكل ما فيا من همّي
هتقبلني بكل ما فيا من أوجاع
ومن تفكير جايبلي صداع
وهتحاول تطمّني

هتقدر يعني في العتمة وتكون لي النور
وهتوافق تحارب جنبي في الأيام
أنا قلبي اتخذل من الناس وبقى مكسور
يا ريت ما يكونش وعدك ليا أي كلام

هتقبلني بكل ما فيا من ضعفي
توقف ضد الحياة في صفّي
ما توجعنيش وتكسرني
هتفهمني وهتكون لي الطريق
والناس ومعنى الحب والإخلاص
ونصّي اللي يكمّلني

4. معرفكش
كلمات: مصطفى حدوته – ألحان: وليد العطار – توزيع: كلوبكس

مش أنت اللي أنا كنت بحبه
مش أنت اللي شايلني في قلبه
مش أنت… مش أنت اللي أنا عايزاه
مش أنت… مش أنت اللي أنا كنت بعزه
واللي ماكنش في حاجة تهزه
مش أنت… مش أنت اللي أنا عارفاه

معرفكش أنت مين أنا معرفكش
شاكّه فيك أنا ماضمنكش
أنت بقيت واحد تاني غير التاني
معرفكش أنت مين أنا معرفكش
روح يا قلبي معطلكش
ويوم ما تتغير تاني تعالى تاني

مش أنت اللي أنا كنت حبيبته
مش أنت اللي أنا بعشق غيرته
مش أنت… مش أنت اللي أنا فاكراه
مش أنت اللي حاططني في عينه
واللي مافيش فرق بيني وبينه
مش أنت… مش أنت اللي أنا عايزاه