تامر حسني يقلب الموازين بـ”لينا معاد”: “تعبت عشان أفرحكم”
متابعة بتجــرد: حقّق النجم المصري تامر حسني صدى واسعًا بعد ساعات من طرح ألبومه الجديد “لينا معاد”، حيث تصدّر مواقع التواصل الاجتماعي، ودخلت جميع أغنياته الـ13 قائمة التريند، وهو ما دفع تامر لتوجيه رسالة مؤثرة إلى جمهوره عبر حسابه الرسمي على “إنستغرام”.
قال تامر: “هنتهز الفرصة الجميلة دي إن أغنية الذوق العالي مع حبيبي اللي بموت فيه الـKing محمد منير تريند عام رقم واحد، وفي تريند الموسيقى لسه أول يوم أهوه، والـ13 أغنية بتوع ألبوم لينا معاد في التريند”.
وأضاف: “عشان أوصل إن ألبومي يدخل التريند كله، وبعيداً عن التريند يعجبكم كده، أنا مشيت مشوار كبير. كنت بقرأ كل تعليقاتكم السلبية قبل الإيجابية، لأني عارف إنكم بتحبوني، وده خلاني أركز وأحلف جوا نفسي إني لازم أفرحكم وأخليكم فخورين بالمجهود اللي عملته”.
وكشف عن جانب إنساني من رحلته قائلاً: “احترمت ذكرياتكم اللي على صوتي، وتعبت تعب مش طبيعي، ودخلت مستشفيات نص السنة ومش بحب أقول ولا أنزل أخبار من دي”.
وأكمل النجم المصري: “من يوم ظهوري وأنا واحد منكم. عارف إن فيه ألبومات مكانتش قد توقعاتكم، وإن فيه ألبومات علامات، وهي دي الحياة. بس كان جوايا تحدي إني أتفوّق على ألبوم عيش بشوقك، اللي عارف قد إيه بتحبوه”.
وتابع: “ذاكرت السوق الغنائي وتغيّراته، واشتغلت على تطوير أدائي داخل الاستوديو لمدة سنتين، مع مهندسين وموزعين وملحنين وشعراء، ويمكن زعلوا مني من كتر التعديلات، بس دلوقتي فرحتي لا توصف وهما بيشكروني قدامكم”.
واختتم تامر حسني رسالته بتأكيد محبته للجمهور: “أنا سمعت كلامكم وتعبت أوي، وأنتوا أكيد شايفين. تعبت عشانكم، وعشان أكون واجهة فنية موسيقية جميلة لمصر، بحكم إني بسافر كتير وأغني قصاد العالم، واسمي مطرب مصري عربي”.
