حسن الردّاد يفجّر مفاجأة عن علاقته بـ إيمي سمير غانم

متابعة بتجــرد: خلال لقائه في برنامج “حد النجوم” الذي تقدّمه المذيعة ريهام السهلي عبر قناة dmc، كشف الفنان حسن الردّاد عن مفاجأة جديدة تجمعه بزوجته الفنانة إيمي سمير غانم بعد نجاحهما في مسرحية “التلفزيون”.

وقال الردّاد: “اللي بيسأل إذا كنت أنا وإيمي هنعمل حاجة جديدة وبيحبوا التعاون بينا، إن شاء الله في حاجة جديدة فيلم بيجمعنا”.

وأضاف: “بدأنا التحضير، السيناريو خلص وحالياً بيتم اختيار باقي فريق العمل وهو فيلم كوميدي وفكرة جديدة وهيتصور بين مصر وكذا بلد وإن شاء الله ينزل في عيد الفطر”.

وخلال اللقاء، كشف حسن الردّاد عن طبيعة علاقته بزوجته إيمي سمير غانم، قائلاً: “إيمي دمها خفيف جداً وهي مش بتكون قاصدة إنها تهزّر أنا بحس إنها سمير غانم الصغير، وأنا شخصيتي بحب الحركة والموسيقى تبقى بصوت عالي وأسوق العربية بسرعة وفي البيت أرقص وأهزّر… هي عكسي بتحب تمشي بالراحة وصمت في العربية ومن هنا بيبقى في مواقف كتيرة بينا”.

وعن كيفية تعارفه على إيمي سمير غانم وبداية قصة حبّهما، قال حسن الردّاد: “أنا في 2009 كنت بعمل مسلسل “ابن الأرندلي” وكانت أمي في المسلسل هي الفنانة دلال عبد العزيز، وقت تصوير المسلسل والدتها توفيت ورحت أعزّي وقابلت إيمي ودنيا وسلّمت عليهم مكنتش أعرفهم قبلها، وبعد كده حصل 3 صدف، قابلت إيمي مرة ماشي بالعربية في وسط البلد بالليل والدنيا فاضية ولمحتها، ومرة تانية داخل المسرح وهي خارجة منه، وتالت مرة أنا داخل المعهد عندي محاضرات وهي بتصوّر مسلسل، متكلّمناش لكن الصدف دي حسيت أن هيكون في بينا حاجة مع أننا متكلّمناش، لغاية لما رحت العزاء وبدأنا نبقى أصحاب وشلّة كبيرة وبدأنا نقرّب من بعض وأنا بحب الضحك جداً وبحب الناس اللي تقعد وتضحك ولقيت دمها خفيف وروحها حلوة وبدأنا نقرّب لبعض، مقدرش أقول في توقيت معين أن هو دا الحب، لكن في توقيت معين حسيت إننا منسجمين جداً وأن مينفعش نكون بعاد عن بعض”.