أحمد السقا يوجه رسالة إعتذار إلى تامر حسني: “حقك عليه”

متابعة بتجــــــــــرد: وجّه الممثل المصري أحمد السقا رسالة خاصة إلى مواطنه النحم تامر حسني، بعد الضجة التي أعقبت التصريحات التي أدلى بها السقا تجاه حسني، في أولى حلقات برنامج (السيرة) الذي تقدمه الإعلامية وفاء الكيلاني على شاشة قناة (أبوظبي).

ونشر السقا اعتذارًا منه تجاه حسني، تحت عنوان (رسالة إلى صديق عزيز)، عبر صفحته الرسمية في موقع “فيسبوك”، وقال في الرسالة: “صديقي وأخي العزيز تامر حسني.. أنت عارف اللي بيني وبينك، عيش وملح وحاجات كتير.. قد أكون أخطأت إني اتكلمت في الموضوع ع الهوا، ولكن يعلم الله كم كنت مجروحاً وكم كنت حزيناً.. مش هاطول عليك أكتر من كده.. ولو أنا زعلت شوية وأنت شوية نبقى خالصين يا عم.. تامر حسني إحنا اللي بينا كتير ما تزعلش يا عم وحقك عليه.. وميعادنا الحفلة اللي جايه.. أحمد السقا)”.

وكان تامر حسني قد نشر توضيحًا بعد تصريحات أحمد السقا عن (زعله) منه بسبب فيلم (الفلوس) الذي طرح صيف العام الماضي، قال فيه: “حبيبي وأخويا وصديق العمر ونجم الدنيا كلها أحمد السقا، كنت أتمنى إنك تكلمني بيني وبينك، لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك وأنا كنت أتمنى مكتبش الكلام ده هنا، بس عشان بعد كلامك في التلفزيون الجمهور الكريم بقى ليه حق إنه يفهم الصح”.

وتابع حسني: “عشان أفكرك بس، إنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم.. وأنا رديت عليك إن دي اجتهادات صحافية والصورة من تصميم المحبين، اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة لا يمكن تعمل كدا، لأن الفيلم متباع للخارج والداخل باسم أخوك تامر حسني، وأصلاً أفيش الفيلم الرسمي نزل والناس كلها شافته، وإنت مش فيه ولا فيه اسمك وكل الأبطال طالعين مرسومين، معرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة”.

وأضاف حسني: “أنا شرحتلك دا من سنة واتكلمنا بعدها مرتين، مرة عيدت عليك في عيد ميلادك والتانية بخصوص برنامجك، لو كنت لسه زعلان كنت هتقولي ساعتها، الفيلم بقاله سنة يا أحمد، أخيراً بقى مستحيل الشركة تروج، أو أنا أفوت أو أسمح باستخدام اسمك كبطل للفيلم وإنت مش فيه، لإن دا هيعود علينا كلنا بالضرر، لإن الناس هتدخل الفيلم مش هيلاقوا الكلام دا.. فيبقى إحنا كدا بنضحك على الناس وضرينا الفيلم، ولأن أكيد يشرفني إن إحنا نمثل مع بعض بطولة مشتركة، لأنك حبيبي بجد ونجم أنا بحبه من قلبي فعلاً». واختتم حسني رسالته الطويلة بالقول مؤشراً إلى مشاركته كضيف شرف في مسلسل السقا الأخير (ولد الغلابة) قائلاً: «وبعدين يا حاج أحمد لما أنا جيتلك مسلسلك، حصل اجتهادات كتير من محبينك الكرام.. شوية يقولوا المسلسل بطولتنا وشوية يقولوا لا دا ضيف شرف بس.. وإنت عارف إن عمري ما عملتها وطلعت ضيف شرف غير ليك، دا أنت طلبتني أجي أصور الساعة 8 الصبح، كنت عندك في نص ساعة عشان فكرة طلعت في دماغك فجأة، وجيت لإنك غالي عندي أوي أوي فوق ما تتصور، وكنت بفرح باجتهادات محبيك ومحبيّ حتى لو صورتي صغيرة أو كاتبين بطولة أو ضيف شرف.. كل دا مش فارق لإني جيت أخدم صديق عمري، وأتمنى أي كلام يصب في مصلحة مسلسل أخويا وينجح ويكسر الدنيا، إنت حبيبي يا أحمد وصديق عمر، عشان كدا أنا مش هزعل منك.. معلش طولت في الكلام لإن برضو زعلك يعزّ عليا”.