وائل كفوري كل الدني، وبحياتك ما كنت إلاّ مثل ما إنت

وصلتنا إلى مكاتب موقع ومجلة “بتجرد” هذه الرسالة الشعرية التي كتبتها الممثلة القديرة والمحبوبة ليليان نمري لمحبوب الجماهير الفنان اللبناني الكبير وائل كفوري وتعبر من خلالها عن مشاعرها ومشاعر كل محبي وائل ونحن منهم تجاه هذا النجم الذي خطف قلوب الملايين بصوته وأغنياته وشخصيته …

“في ناس بهالحياة ربنا بيعطيهم نعمة القبول، بيخلق فيهم صفات ما بتشبه حدا ان كان من ناحية الصوت او الحضور او الشخصية. ومن هالناس خلق شب حتى يكون فرحة بقلوب الناس، الناس اللي بتعشق .. بتكره .. بتتوجع وبتحب

هالشب من بداية مشواره زرع عناقيد عا دروب العشاق، اختار الكلمة واللحن .. بيعرف يقطف عناقيد الحب، كان وبعدو قادر يلملم جروح المحبين يحكي اوجاعهم اللي ما بتخلص، صوت بيوصل عا اغلا الارزق تحت السما بشوي، ومن فوق بيعلا تا يوصل عا حضن الملايكة حتى يراعوه ويحموه

قلوب بكيت مع الاهات وعيون فرحت من اوتار صوتو، متل اللي بيغزل صوف بليالي الشتي
متل النومة تحت شجرة بالهوايات ايام الصيف، متل الورد اللي بيدبل عا امو بحنيي، متل بي بياخد عا خاطرو ان ما وصل صوتو لحدود الريح.

مش لانو بحبو عمقول هالحكي لانو هو هيك وهو كل الدني، سنة بعد سنة مننطر مواويل الغنج عم بتدق بوابنا، سنة بعد سنة منتحسَّر عا حب راح او حب بعد ما ابتدا، سنة بعد سنة منطلب من الله يطولنا بعمرو حتى الحلا يكبر مع كل نغماتو

منحبك متل ما الله علمنا نحب، نحبك مش هيك كيف ما كان، بحياتك ما كنت الا متل ما انت
ومحبتك عم تغلا بعيون البسمات، وائل كفوري قليل كتير مهما قلت ربي يعطيك كل الفرح ويطول بعمرك وتضل عم تعطينا كل الامل والحب بزمن صار الحب كلمة بحلــِم ..

وائل خليك متل ما انت وخَّلي العمر ما يخاف لما القلب ما يدق.. خليك كل العطر خليك كل الورد … بكرا القلب بيدق ومنقلو قرب اسماع القلوب كيف بتدق

منحبك لتخلص الدني”.

  ليليان نمري