“بلاوي سودة”.. مصطفى كامل يفضح تجاوزات نقيب الموسيقيين السابق

متابعة بتجــرد: فتح الفنان مصطفى كامل نقيب الموسيقيين النار على الموسيقار منير الوسيمي بعد صدور تقرير الجهاز المركزي للمحاسبات، والذي كشف عن مخالفات مالية عدة في الفترة التي كان الوسيمي فيها نقيباً للموسيقيين، حيث أكد أن “بلاوي سودة”

وقال مصطفى كامل في مؤتمر صحافي: “هو نزل من أسبوعين دعم ليا، وكتبت منشور قولت فيه هذا الدعم لا يشرفني ويشرفني دعم زملائي كلهم المحترمين، وانهالت بعدها التعليقات علي من زملاء بيقولوا إنه متمش محاسبته عما تم في الجهاز المركزي للمحاسبات من مخالفات صارخة وطالبوا بالتحقيق معه، ومكنش قدامي فرصة غير إني ألبي طلب الجمعية العمومية”.

وأضاف: “أنا فتحت لهم التحقيق، وبعد منير الوسيمي طلع يسب ويقذف ومعرفش بيعمل كده ليه وبشوف إن ده نتاج طبيعي لأي شخص بيعمل حاجة غلط وميتمش محاسبته، مش عارف بيفكر إزاي، الشكوى المقدمة ضده مرفقة بمستندات وتقارير جهات سيادية زي الجهاز المركزي للمحاسبات”.

وتابع: “منير مثلاً كان مخصص العلاج للزملاء بـ500 جنيه ومعالج نفسه بـ32 ألف جنيه، ودافع للموبايلات الخاصة بتاعته أرقام مهولة، وإحنا بيحظر علينا في العمل العام تقاضي أي عضو مجلس أي أموال؛ لأنه عمل خدمي تطوعي، وحالياً إحنا مدخلين في أقل من 6 أو 7 شهور حوالي 70 مليون جنيه، هو كان في التقرير بتاعه السنوي بيدخل للنقابة 12 مليون وبياخد منها عمولته 5%، طبعاً كل ده مخالفات صارخة. وفي تقرير الجهاز المركزي للمحاسبات هو ذاكر تكاليف سفرية ما، والجهاز المركزي طالبه بجدوى السفري؛ لأنه غير مرفق مستندات لا تذكرة سفر ولا فيزا ولا حساب فنادق، وممكن يكون الفلوس اتاخدت في حسابات، وفيه أمثلة كتير من ده أوي”.

واختتم مصطفى كامل حديثه قائلاً: “والله ما أنا اللي طرحت القضية، اللي طرح الموضوع نقباء فروع زي نقيب فرع الغربية الأستاذ أشرف الشهداوي ومجموعة موسيقيين وقالولي طول ما إحنا سايبين ناس لا تحاسب على ما فعلوه بالنقابة، هتكون النقابة مطمع، وبمجرد ما اتفتح التحقيق دخل هو معايا في مساومات وكلام مرسل وكلام مش منضبط”.