Bitajarod – Online Magazine Bitajarod – Online Magazine
متابعة بتجــرد: بعد حملة الهجوم التي شُنّت على الفنانة منى زكي عقب طرح البوستر الرسمي لمسلسلها الرمضاني الجديد “تحت الوصاية”، خرج عدد من الفنانين والإعلاميين للدفاع عنها مؤكدين أنها تتعرّض لحملة هجوم ممنهجة.
وفي إطار الدفاع عنها، استنكر الإعلامي عمرو أديب في برنامجه “الحكاية” الهجوم على منى زكي بعد طرح بوستر المسلسل، قائلاً: “الناس بتقول ليه المحجبة وحشة كانوا عاوزينها محجبة قمر، أنت عارف هي بتلعب دور إيه أصلا؟ هو إيه محاكم التفتيش دي، هو إحنا هنعمل دراما أن فيه راجل خير اتجوز واحدة خيرة وجابوا عيال خيرين وطلعوا للمجتمع وعملوا اختراعات والمجتمع وقف جمبهم ونهاية الفيلم كل المجتمع أخيار إيه الدراما دي؟.
وأضاف: “الدراما دورها إنها تدق ناقوس الخطر وتحل مشكلة وقانون عاوز يتغير، فيبدأ المجتمع يتكون جواه عقل جمعي لمشكلة، زي فيلم “أريد حلاً” لفاتن حمامة هو ده اللي عمل حالة مش مقالة ولا برنامج”.
وأردف أديب قائلاً: “بلاش يكون فيه دراما في البلد؟، ده المسلسل ما صوروش فيه إلا حلقتين، خلونا نواجه نفسنا، أنتم عارفين إيه سبب الدوشة اللي مع منى زكي، ده لأن فيه ناس مستكترة على منى زكي إنها تعمل دور بالحجاب، هي غلطت في مين ولا ضايقت مين ولا عملت مشكلة مع مين؟، اهدوا شوية وارد وجايز الحواجب دي تعجبك، أنا مستغرب إحنا واصلين لمرحلة الحواجب هي لازم تطلع وحشة يعني ولو طلعت حلوة وعاملة حواجبها هيتقال هو في محجبة هتعمل حواجبها كده، هو إيه شغل كيد النسا ده؟.
وواصل: “مسلسل نيوتن كان خارق للعادة وفاخر، ومنى زكي ممثلة جبارة، هو أنتم عاوزين نعملها مبسترة ودراما خالية الدسم، ده إحنا بنشوف كل يوم قتلة في الأسعار والنصب والكذب وبنشوف نماذج لحاجات مشوهة وإلا كانت الدنيا حلوة”.
واختتم عمرو أديب حديثه قائلاً: “استنوا لما تشوفوا المسلسل ومن حقك تنتقد، إنما تنتقد حواجبها هذا ما لم نسمع به من قبل، ده ترصد واستقصاد وتوحش وأنتم عارفين أنتم بتعملوا إيه وعارفين أنتم بتعملوا كده ليه وبأمارة إيه وعلشان ايه ومحدش بيقول، لكن ده مش علشان الحواجب وكلنا عارفين”.
وكانت منى زكي قد واجهت حملة هجوم شرسة بعد طرح بوستر منفرد لها من مسلسلها الجديد “تحت الوصاية” والمقرر عرضه خلال شهر رمضان 2023، وظهرت فيه بحجاب وبدون أي مساحيق تجميل، وهو الشكل الملائم للشخصية التي تلعبها ضمن الأحداث لامرأة مكافحة تتتولى تربية أبنائها بعد وفاة زوجها وصراعها على الميراث حتى تتمكن من إعالتهم… وعلّق عدد من رواد مواقع التواصل الاجتماعي على شكل الحاجبين اللذين تظهر بهما البطلة على الأفيش مؤكدين أنها محاولة لإظهار السيدة المحجّبة بصورة مغايرة للواقع.
