Bitajarod – Online Magazine Bitajarod – Online Magazine
إلتقى النجم تامر حسني بروابط محبيه في جلسة ودّية إجتمعت فيها روابط عشاقه للبحث في العديد من الأمور التي يواجهونها، أعماله المستقبلية وحفلاته. وخلال فترة تعدت الخمس ساعات وعد تامر عشاقه الذين وصفهم بإخوته بتصويب العديد من الأمور منها الإعلان عن مواعيد حفلاته قبل فترة منها على صفحته الرسمية على موقع Facebook.
وانتهي الاجتماع باتخاذ العديد من الإجراءات أهما، تعيين اثنين من رؤساء الروابط وهما أحمد هاشم وأدهم بكرى ليكونا مسؤولين أمام تامر والجمهور عن تيسير دخول الجماهير لحفلات تامر حسني وتوفير كل سبل الراحة لهم.
أما عن إمتناعه عن إحياء الحفلات الجماهيرية الكبيرة مثل حفليه بمارينا عامي 2009 و2010، أكد تامر أنه قصد ذلك نظراً للظروف التي كانت تمر بها البلاد وعدم تحملها لإقامة حفلات كبيرة، مشدداً على أن سلامة الجماهير هي أولوية بالنسبة له. كما وأكد تامر أنه يحضر بالفعل لحفل جماهيري كبير، إلا أن حفله في إستاد القاهرة في رابع أيام عيد الأضحى لا يعتبر حفل كبير إنما حفل خاص بعيد عن إحتفاله بألبومه الجديد 180 درجة.
بيان إتحاد روابط تامر حسني:
البداية – امبارح كان يعتبر البداية الحقيقية لاتحاد روابط تامر حسنى – اسمحولى اتكلم بالعامية فى البيان عشان بجد امبارح مكنش ميتنيج بين تامر و 8 اشخاص هما رؤساء الاتحاد لا ده كان ميتنيج بين تامر واكتر من 14 مليون شخص بيحبه تامر فبجد نفسى كل الكلام يوصلهم اكنهم كانوا معانا امبارح بالضبط
الميتنيج امبارح امتد ل 5 ساعات متواصلة تامر فتح لينا قلبه بجد واتقبل كل كلامنا واتكلمنا فيها فى كل حاجة تخص تامر وجمهوره الحمد لله واتكلمنا فى مشاكل كتير وكان تامر متعاون معانا جدا وكان بيحط الحلول الممكنة لحل اى مشكلة عشان كده احنا فى اول البيان لازم نشكر تامر بجد اول حاجة عشان تقبل كل النقد بصدر رحب تانى حاجة وعدنا بحل كل المشكلات اللى بتواجه الاتحاد والجمهور وقالنا حلول فعليه نشتغل عليها ومهما اتكلمنا عن تواضع تامر بجد مش هنقدر نوفى للراجل ده حقه .
1- أول حاجة اتكلمنا فيها مع تامر موضوع الحفلات قد ايه ممكن ناس من جمهور تامر يتعب ويتبهدل فى الحفلات فى حاجة خارجة عن اراده تامر طبعا ووصلنا الصورة زى ما هى بالضبط عشان كده كان اول قرار من تامر لينا وهو تعيين اتنين من رؤساء الروابط وهم ( أحمد هاشم , ادهم بكرى ) وهم المسئولين امام تامر حسنى وجمهوره فى توفير كافة سبل الراحة لهم فى جميع الحفلات منذ بداية الحفلة حتى نهايتها تماما من دخول الجمهور وتعليق بانرات الروابط والتصوير وكل ما يخص الجمهور .
2- موضوع بعض الصور اللى بتنزل على الاوفيشال بيدج وخصوصا صور الحفلات بشكل لا يليق بالفنان تامر حسنى وموضوع التأخير عن الاعلان عن بعض الحفلات على الصفحة الرسمية ووعدنا بحل المشكلة ده فى اقرب وقت وفرح جدا لاننا بنهتم بشغله اكتر من شغلنا لانه فى النهاية هى منظومة واحدة بتكمل بعضها .
3-موضوع ان الجمهور نفسه يشوف حفلات لتامر زى حفلات تامر فى مارينا 2009 و 2010 وتامر كان رده ان ظروف البلد مكنتش تسمح فى الفترة الاخيرة بالحفلات الكبيرة ده وان تامر اهم حاجة عنده سلامة الجمهور وان كل الحفلات اللى عملها فى مصر فى الفترة الاخيرة حفلات خاصة مش حفلات جماهيرية كبيرة وان تامر بيحضر دلوقتى لحفلة كبيرة للالبوم ان شاء الله هيتم الاعلان عنها قريبا جدا وقالنا امبارح ان حفلة الاستاد رابع يوم العيد حفلة خاصة ايضا ومش حفلة الالبوم .
4- تامر هو اللى سألنا بنفسه عن رأينا فى البوم 180 درجة وكل واحد فينا قال وجه نظرة ورأيه بجد بدون اى تحيز وتامر اتبسط جدا بوجه نظرنا ووعدنا انه هيفكر فى وجهات النظر ده فى الاعمال المقبلة سواء الاعمال الغنائية او السينمائية .
5- اتكلمنا فى موضوع مواعيد الاعمال وان الجمهور يصاب بالاحباط اما العمل يتأجل مرة واتنين واكتر وتامر كان رده فيها ان اكيد مش بيبقى قاصد ده بس فيه مشاكل فى شركات الانتاج بيحصل بسببها التأخير ده اللى خارج عن ارادته بس تامر وعدنا الفترة القادمة ان هيركز فى الموضوع ده قريب جدا وهيحل كل المشاكل ده ان شاء الله .
6- اتكلمنا مع تامر فى موضوع انه لازم يرجع يتواصل كل فترة مع جمهوره بشكل متقارب وتامر وعدنا انه كل فترة هيتواصل مع جمهوره من خلال الفيس بوك او تويتر وهيسمع كل الاراء وان بعد كده لازم يبقى فيه مكان خاص لجمهور تامر حسنى للاحتفال بالالبوم وميتنيجات حجز الحفلات بعيدا عن المولات والاماكن الحيوية اللى مبقاش ينفع يحصل فيها تجمعات فى مصر .
6- تامر قالنا رسالة من قلبه بجد نفسه كل جمهور تامر يلتزم بيها وهى ان محدش فيهم يغلط فى الفنان عمرودياب او جمهوره خالص وقال ان اللى بيحصل دلوقتى من مشادات وخناقات بين الجمهورين ده اسوء حاجة فى مشواره الفنى ونفسه بجد ميبقاش فيه اى تعصب او مشكلات وكل جمهور فنان يحب فنانه بعيد عن الخناقات والتعصب ووعدنا تامر اننا نوصل رسالته ده للجميع .
فى النهاية احب اقول انه كان ميتنيج عفوى جدا من القلب للقلب وزى ما تامر معودنا اتقبل كل الكلام بشكل حضارى جدا وجميل ورد على كل الاسئلة او الاستفسارات اللى جمهور تامر كان بيرددها فى الفترات الاخيرة .. وأحب فى النهاية زى ما شكرت الفنان تامر حسنى على كل حاجة نشكر اخونا جلال فهمى على كل حاجة عملها معانا ونشكر هالة عمر اللى وقفت جنب الاتحاد وساندتنا كتير وفى النهاية الجندى المجهول عزيزة الشرقاوي اللى عملت حاجات كتير للاتحاد فى فترة قصيرة اوى …ولازم اشكر الجمهور العظيم اللى دايما معانا وبيدعمنا لانه فى النهاية لولا ثقة الجمهور ده فى الاتحاد مكنش اى حاجة حصلت من ده ودايما مكملين مع بعض على الخير دايما ان شاء الله وشكرا .
